Visti tú, at Gud gloymir? Hóast tað er ein ávís andsøgn í, at ein alvitandi Gud kann gloyma, so er tað satt. Gud velur at gloyma syndir okkara.
Heb 8:12: “Tí Eg skal vera órættvísi teirra náðigur og ikki longur minnast syndir teirra."
Hóast vit menniskju gloyma nógv, so hava vit lyndi til at minnast syndir. Bæði okkara egnu og – kanska serliga – tær hjá øðrum. Tí síggja vit bæði okkum sjálv og medmenniskju okkara í ljósinum av tí, vit hava gjørt.
Men soleiðis er Gud ikki. Sum Heb. 8:12 sigur, so er Hann órættvísi okkara náðigur og minnist ikki longur syndir okkara. Nøkur vers frammanundan sigur Gud, at Hann vil gera ein nýggjan sáttmála við fólk Sítt. Tað er í ljósinum av hesum nýggja sáttmála, at Hann sær okkum í dag.
Vit vita, at øll menniskju synda. Men gleðiboðskapurin er, at Jesus hevur goldið fyri allar okkara syndir, og tær eru skolaðar burtur í blóði Hansara.
Hin rættvísi Gud kann í dag siga, at Hann minnist ikki syndir okkara. Tí at ein dag fyri langari tíð síðani, mintist Hann tær og revsaði tær allar á krossinum.
Í dag sær Gud okkum tí uttan syndir okkara, og vit kunnu við dirvi fara fyri trónu Guds og liva í Hansara rættvísi.
Skrivað hevur Tóri Højgaard
Lýsing